Делчево, 16 август 2023 (МИА) - Културно-уметничкото друштво „Гоце Делчев“ од Делчево ја продолжува соработката со Друштвото за култура „Каблови" од Јагодина од Србија. Во рамки на соработката, делчевското културно-уметничко друштво деновиве настапи на летната сцена при Домот за култура во Јагодина, каде одржа концерт за љубителите на фолклорот од оваа Општина.

 -Во Јагодина со специјално подготвен концерт за приустните настапивме со дел од играчката и пејачката секција, а во рамки на своите настапи редовно ги презентираме и народните носии од повеќе краишта на Македонија. Имаме оригинални носии буквално од сите краеви на Македонија. Секогаш е различна и во склад со кореографијата која се изведува. Носијата ја пратат и сите додатоци кои се потребни и затоа и изгледа така убаво на сцената. Каде и да одиме секогаш не повикуваат на бис, истакна претседателката на КУД „Гоце Делчев“ Соња Мавродиева – Георгиевска.

КУД „Гоце Делчев" настапува ширум Европа, а следната година ќе одбележи половина век постоење и успешна работа. .

-Соработката со Домот за култура „Каблови" е долга и прекрасна, тука доаѓаме 39 години а тие доаѓаат на нашиот фестивал во септември. Љубовта е обострана и се надеваме дека така ќе биде уште долго, додаде Мавродиева Георгиевска.

Културно-уметичкото друштво „Гоце Делчев“ кое е формирано пред 49 години, во моментов има 202 членови од сите старосни генерации.вс/бт/

Фото: МИА