Москва, 10 јуни 2025 (МИА) - Русија останува подготвена за размена на телата на загинатите украински војници и одржува контакт со Киев по ова прашање, соопштија денеска од Кремљ.

Од таму додадоа дека некои од телата сè уште се чуваат во камиони со ладилници за предавање. Русија претходно соопшти дека возилата, кои првично пренесувале над 1.000 тела, се паркирани во близина на точката за размена од сабота, чекајќи Украина да ги преземе. Московските претставници се пожалија дека Киев сè уште не го сторил тоа. Размената беше договорена за време на вториот круг директни мировни преговори во Истанбул на почетокот на месецот.

Од Кремљ изјавија дека сè уште не знаат колку тела на руски војници Украина е подготвена да предаде. Во меѓувреме, се очекува денеска рускиот претседател Владимир Путин да одржи состанок на Советот за национална безбедност, кој ќе се фокусира на политиката за традиционалните вредности на земјата. ссм/

фото: архива