Пекинг, 26 јули 2025 (МИА) – Кина изрази остар протест до Јапонија поради посетата на тајванскиот министер за надворешни работи Лин Чиа-лун, обвинувајќи го Токио дека му овозможува на Тајван да спроведува сепаратистички активности.

Протестот бил пренесен од страна на директорот на Азијската служба во кинеското Министерство за надворешни работи, Лу Џусонг, при средбата со јапонскиот амбасадор во Пекинг, Акира Јокочи. Лу ја обвини Јапонија дека испраќа „погрешен сигнал“ со дозволата за посетата.

Посетата предизвика реакции откако јапонскиот пратеник Кејџи Фуруја, претседател на парламентарната група за пријателство со Тајван, објави фотографија со Лин на социјалните мрежи.

И покрај тоа што Јапонија од 1972 година официјално го признава Пекинг, таа продолжува да одржува неформални односи со Тајпеј. Кина го смета Тајван за своја провинција и постојано предупредува дека обединувањето е „неизбежно“, дури и со сила, ако е потребно.

Кинеското Министерство за надворешни работи соопшти дека тајванското прашање е „во сржта на кинеските интереси“ и побара Јапонија итно да ги санира последиците од посетата. ссм/

фото: архива