• сабота, 17 февруари 2024

Кина предложи план од четири точки за мир на Блискиот Исток во СБ на ОН

Кина предложи план од четири точки за мир на Блискиот Исток во СБ на ОН

Њујорк, 29 ноември 2023 (МИА) – Кина денеска пред Советот за безбедност на ОН претстави мировен план од четири точки за Блискиот Исток, покажувајќи ја својата амбиција да биде глобална суперсила.

Војната меѓу Израел и палестински Хамас укажува на потребата од палестинска држава покрај Израел, изјави кинескиот министер за надворешни работи Ванг Ји во своето обраќање на седницата на Советот за безбедност на ОН посветена на Блискиот Исток, вклучително и на палестинското прашање.

- Треба да ги ревитализираме изгледите за решение со две држави со посилно убедување, рече тој и додаде дека фактот што нема палестинска држава е суштината на повторените немири во палестинско-израелската ситуација.

- Израел одамна воспостави независна држава и Евреите веќе не се без дом. Меѓутоа, правото на палестинскиот народ на државност, неговото право на постоење и неговото право на враќање се игнорирани долго време, додаде кинескиот министер, чија земја претседава со Советот за безбедност до крајот на месецот.

Праведно и законско решение на палестинското прашање се состои во решение со две држави, додаде тој, нагласувајќи дека тоа е незаменливо.

Во врска со две од преостанатите три точки, Ванг рече дека светот треба да работи на сеопфатен траен прекин на огнот со најголема итност и на подобра заштита на цивилите.

Четвртата точка е дека Советот за безбедност треба да сноси одговорност за водечките прашања на војната и мирот и животот и смртта и, во услови на развојот на ситуацијата на теренот, итно да преземе дополнителни активности. Тој не кажа каква акција треба да преземе Советот за безбедност. јт/

Фото: МИА архива

Остани поврзан