Тел Авив, 6 октомври 2024 (МИА) - Израелскиот министер за одбрана Јоав Галант денеска го предупреди Иран дека може да помине како Газа или Бејрут, доколку се обиде да му нанесе штета на Израел.

- Иранците не ја допреа способноста на нашите воздушни сили, ниту еден авион не е оштетен, ниту една ескадрила не е ставена надвор од функција, соопшти Галант, мислејќи на неодамнешниот ирански ракетен напад врз Израел.

- Кој и да мисли дека обидот за нанесување штета ќе не одврати од акција, треба да ги погледне нашите постигнувања во Газа и Бејрут, додаде Галант.

Иран соопшти дека во ракетниот напад во вторникот биле погодени две воздушни бази на Израел, што било одговор на убиството на лидерот на либанскиот Хезболах Хасан Насала и иранскиот генерал Абас Нилфорушан во нападот на Бејрут на 27 септември.

Галант денеска ја посети воздушната база Неватим во пустината Негев, која била погодена од иранските ракети.

Експерт кој анализира сателитски снимки и видеа на социјалните мрежи, изјави дека базата била директно погодена 32 пати, пренесува британски „Гардијан“.

Галант изјави дека израелските воени операции не се нарушени и дека Израел е силен и во одбрана и во напад, што ќе го покаже на начин, време и место што ќе го избере.

Иран во вторникот истрелал околу 180 ракети врз Израел, од кои повеќето биле пресретнати, како што тврдат израелските официјални лица. ссм/

фото: архива