Варшава, 20 август 2025 (МИА) - Дрон се урна во поле со пченка и експлодираше во источна Полска денеска, што доведе до истраги за изворот.

Дронот падна во поле во близина на селото Осини, околу 100 километри југоисточно од Варшава, рано наутро.

На прес-конференција, јавниот обвинител кој се занимава со случајот рече дека дронот бил воен летачки објект и бил „оштетен од ефектите на експлозивите“.

Додека министерот за одбрана Владислав Марцин Косињак-Камиш првично рече дека дронот не е за воена употреба, истражителите сега ја исклучија можноста дека станува збор за цивилен дрон што го користат шверцери.

Местото на ударот е на 120 километри од границата на Полска со Украина и 100 километри од границата со Белорусија.

Снимките од локалниот портал ЛуковТВ покажаа блесок светлина, а потоа и силен тресок.

Прозорците беа скршени во неколку блиски куќи, но никој не беше повреден.

Полициските службеници повикани од жителите пронајдоа изгорени пластични и метални остатоци на местото на експлозијата.

Порталот „Онет“ објави слики од социјалните мрежи на кои се гледа изгорена машина со пропелер.

Косињак-Камиш рече дека полицијата и војската моментално го обезбедуваат и пребаруваат целото подрачје, користејќи хеликоптери и извидувачки дронови.

Во ноември 2022 година, ракета го погоди селото Пжеводов во источна Полска, при што загинаа двајца мажи. Се верува дека инцидентот е предизвикан од залутан украински противвоздушен проектил. мс/

фото: МИА архива