Манчестер, 2 декември 2024 (МИА) - Фудбалерите на Манчестер Сити го имаат потребниот карактер за излез од лошата серија, изјави дефанзивецот Рубен Диас по поразот од Ливерпул со 0:2 во натпреварот од 13. коло на Премиер лигата.

Ова беше четврти последователен пораз на шампионите во Премиер лигата и сега заостануваат 11 бода зад „црвените“ на табелата. Сити загуби четири натпревари во низа за прв пат од 2008 година, а тимот исто така е без победа во седум натпревари во сите натпреварувања. Во овој период тимот од Манчестер прими 19 голови.

-Не сакам да зборувам за мали детали, туку за целата слика пред нас. Времињата се тешки, но го видов карактерот на нашиот тим и почувствував дека навивачите нè поддржуваат безрезервно. Без овие два клучни фактори, нема излез од сегашната ситуација, изјави Рубен Диас по поразот од Ливерпул

Манчестер Сити, кој освои шест од последните седум титули во Премиер лигата, моментално се справува со голем број повредени играчи, вклучувајќи ги клучните играчи како Родри, Матео Ковачиќ и Џон Стоунс. 
Сепак, шампионите беа во слични ситуации и во претходните сезони, но не западнаа во ваква криза.

- Во минатото успевавме да се прилагодиме на ситуацијата и да продолжиме понатаму, размислувајќи натпревар по натпревар. Тоа мора да го направиме сега, по тоа сме познати, додаде Диас. дс

Фото: Принтскрин