Скопје, 6 ноември 2023 (МИА) – Бензините од ноќеска на полноќ поевтинуваат за половина денар за литар, а цената на дизел горивата се намалува за еден денар, одлучи денеска Регулаторната комисија за енергетика, водни услуги и услуги за управување со комунален отпад (РКЕ). Со одлуката се врши намалување на малопродажните цени на нафтените деривати во просек за 0,86 отсто.

Новата малопродажна цена на ЕУРОСУПЕР БС-95 изнесува 81 денар за литар, ЕУРОСУПЕР БС-98 ќе се продава за 83, ЕУРОДИЗЕЛ (Д-Е V) за 80,5, а Екстра лесното масло за домаќинство (ЕЛ-1) за 80 денари за литар.

Со одлуката на РКЕ за 0,29 денари за килограм се намалува и малопродажната цена на Мазутот М-1 НС и ќе изнесува 46,001 денар.

Како што посочуваат од РКЕ, референтните цени на нафтените деривати на светскиот пазар во споредба со претходната пресметка бележат намалување кај бензините во просек за 0,515 отсто, кај дизелот за 2,072, кај екстра лесното масло за 1,535 и кај мазутот за 0,727 отсто. Курсот на денарот во однос на доларот е повисок за 0,065 отсто во споредба со претходната пресметка. вј/дма/

Фото: МИА архива