Берлин, 1 септември 2023 (МИА) - Речиси 100-годишен маж е обвинет во Германија за соучесништво во убиствa додека бил чувар во нацистичкиот концентрационен логор Заксенхаузен од 1943 до 1945 година, за време на Втората светска војна, објавија денеска обвинителите.

Обвинението е поднесено до судот во Ханау, кој ќе одлучи дали ќе го испрати на судење, но доколку е така, ќе му се суди според законот за малолетници, земајќи ја предвид неговата возраст во времето на наводните злосторства. Сега 98-годишниот германски државјанин, чие име не е објавено, живее во областа Мајн-Кинциг во близина на Франкфурт.

Тој е обвинет по повеќе од 3.300 точки од обвинението за соучесништво во убиствa извршени меѓу јули 1943 и февруари 1945 година со „поддршка на сурово и злонамерно убиство на илјадници затвореници како припадник на СС единицата“, се вели во соопштението на обвинителството во Гисен.

Обвинителите соопштија дека психијатрискиот експерт минатиот октомври утврдил дека тој е способен да му се суди. ссм/

фото: архива