11 март 2025

Градоначалникот Горан Герасимовски, денеска оствари средба со возрасните центарци од Здружението на пензионери на Општина Центар, каде што се дискутираше за проектите што се имплементираат за подобрување на нивниот квалитет на живот.

На средбата, Герасимовски ги информираше пензионерите за услугата бесплатен транспорт на неподвижни лица до здравствени установи. За оваа услуга,  граѓаните треба однапред да се јават на телефонскиот број 02/15330, во контакт центарот на ЦКРСМ или секој работен ден од 6:00 до 0:00 часот. Со поддршка на Црвениот крст, исто така, се реализира и новата услуга „Итно копче“, која овозможува брза реакција во итни ситуации за граѓаните над 65 години, особено за оние кои живеат сами или со партнер со нарушена здравствена состојба.

„Со воведување на услугите како Итно копче, нега во домашни услови и бесплатни стоматолошки прегледи, сакаме да се осигураме дека нашите пензионери имаат достапна поддршка во секојдневието. Овие средби се можност за разговор и размена на идеи, со што заедно создаваме решенија кои реално ги задоволуваат потребите на пензионерите“, истакна Герасимовски.

Во изминатите три години, Општина Центар додели еднократна парична помош на повеќе од 3.500 пензионери во вкупна вредност од над 10 милиони денари. Дополнително, преку проектот за нега во домашни услови „Центар се грижи за возрасните“, општината редовно посетува 90 домаќинства, а слободни места се сè уште достапни за нови апликанти.

Пензионерите ја поздравија поддршката што ја добиваат од општината, особено во делот на социјалната заштита. Герасимовски потсети дека во Центар функционираат осум пензионерски клубови кои служат како важни центри за дружење, размена на искуства и ангажман во различни активности.

„Животот е убав во секоја доба, а нашата должност е да ја возвратиме грижата кон оние кои со децении придонесувале за нашето општество. И годинава, организираме еднодневна екскурзија за пензионерите. Остануваме фокусирани на развивање на мерки кои ќе овозможат достоинствен и квалитетен живот за највозрасните центарци“, рече Герасимовски.

Општина Центар

_____________________________________________________________________________________ 

МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки