Манчестер, 15 декември 2024 (МИА) - Менаџерот Пеп Гвардиола изјави дека не би го оставил англискиот фудбалски клуб Манчестер Сити во сегашната позиција. Откако потпиша нов двегодишен договор на крајот на ноември, шпанскиот тренер победи само на еден од следните шест натпревари на шампионот во сите натпреварувања.

Манчестер Сити е само петти на табелата во Премиер лигата со 27 бодови, додека лидерот Ливерпул има девет предност. Тимот веќе испадна од ФА Купот и се наоѓа на 22-то место во Лигата на шампионите откако загуби со 2-0 од Јувентус на почетокот на неделата. Во новиот формат, најдобрите 24 клубови одат во елиминации.

Запрашан дали има резерви за новиот договор, Гвардиола рече: „Воопшто не. Ако го напуштам клубот во сегашната ситуација, нема да можам да спијам. Тоа е невозможно. Тие би можеле да ме отпуштат, тоа е реално. Но да заминам на оваа позиција?“

Гвардиола дојде во Сити во 2016 година од Баерн Минхен и веќе има 18 големи трофеи. По историската тројна круна во 2023 година, вклучувајќи ја и долгоочекуваната титула во Лигата на шампионите, Шпанецот смета дека неговото наследство во англискиот клуб е добро. Сепак, 53-годишниот тренер се уште е амбициозен да го одржи елитното ниво на Сити.

-Она што го направивме, го направивме. Веќе уживавме и ќе остане засекогаш во историјата. Во сегашната ситуација не би заминал бидејќи имам многу работа. Ништо не трае вечно, а ако не можам да се снајдам, ќе им кажам да пробаат со друг човек. Сепак, во моментов не се чувствувам така, изјави менаџерот на Сити. дс

Фото: Архива