Велес, 15 ноември 2023 (МИА) - Во акција за дарување на крв во хемиското училиште ССОУ „Димитрија Чуповски“ во Велес денеска беа собрани 18 крвни единици. Во акцијата учествуваа и наставници и ученици, а 11 од нив првпат даруваа крв и така влегоа во Друштвото на хуманите, информира за МИА Орце Николов секретар на ООЦК Велес.

-Со тоа велешките средношколци како и многупати досега ја искажаа својата хуманост на дело да спасат нечиј живот во опасност, потенцира Николов.

Акцијата за дарување на крв е традиционална и беше во рамките на патрониот празник на ССОУ „Димитрија Чуповски“.

Во октомври успешна акција за крводарување со собрани 48 крвни единици беше организирана меѓу средношколците од електро-машинското училиште ССОУ „Коле Неделковски“ а во декември се планира и заедничка на двете училишта Економска и Гимназија,најави Николов.

Ова се втори годинашни акции во велешките четири средни училишта, по успешните кои беа организирани пролетта.

Акциите ги организира Општинската организација на Црвен крст со свои волонтери ученици и медицинска екипа на Институтот за трансфузиона медицина од Скопје, а денешната акција ја предводеше Кире Тодоров. ад/ир

Фото: МИА