Во Кавадарци работна средба на тема жртви на семејно насилство
- Да се спречи семејното насилство, беше темата на работната средба што денеска се реализираше во Кавадарци. Во септември годинава, тиквешкиот регион го доби првиот регионален советувалиштен це
![Во Кавадарци работна средба на тема жртви на семејно насилство](https://mia.mk/images/20221128070128_big_730x400_78.webp )
Кавадарци, 23 ноември 2022 (МИА) - Да се спречи семејното насилство, беше темата на работната средба што денеска се реализираше во Кавадарци. Во септември годинава, тиквешкиот регион го доби првиот регионален советувалиштен центар за помош и поддршка на жртви на родово базирано и семејно насилство.
На работната средба беше потпишан меморандум за воспоставување на центарот, како и договор за финансиска поддршка на граѓански организации. Документите ги потпишаа градоначалниците на Кавадарци, Неготино, Демир Капија и Росоман, како и претставници на Националната мрежа против насилство врз жените и семејно насилство и Здружението за родова еднаквост „Визија" од Кавадарци.
- На средбата ги повикавме советничките од Советите на четирите општини и членовите во комисиите за еднакви можности, како и претставнички од форуми на жени од сите политички партии. Да им се заблагодариме на досегашната поддршка и да побараме поддршка за нашата работа во советувалишниот центар и во наредниот период. Укажавме на нужната потреба од негово функционирање и направивме презентација за досегашните активности, појасни за МИА, Благица Коцева - Тодорова, претседател на „Визија".
Таа додаде дека на жртвите на семејно насилство, во Центарот на располагање им стојат стручни лица и тоа за правна поддршка, социјален работник и психотерапевт.
Пред присутните говореше и Ана Аврамовска - Нушкова, проектен координатор во Националната мрежа. Се осврна на досегашните, сегашни и идни активности, поврзани со оваа проблематика. Таа и овојпат нагласи дека со сево ова, се придонесува за побрзо реинтегрирање во општеството. свд/цр
![thumbnail_IMG_20221123_101704](/articles/images/d0b2d0be-d0bad0b0d0b2d0b0d0b4d0b0d180d186d0b8-d180d0b0d0b1d0bed182d0bd/L8bJnsnU3/placeholder.webp?use_watermark=0)
![thumbnail_IMG_20221123_101810](/articles/images/d0b2d0be-d0bad0b0d0b2d0b0d0b4d0b0d180d186d0b8-d180d0b0d0b1d0bed182d0bd/ayrZUOZLj/placeholder.webp?use_watermark=0)