Вкупно 53 пожари на отворено вчера, 12 сѐ уште активни
- Вкупно 53 пожари на отворен простор низ државава се евидентирани во текот на вчерашниот ден. Од нив во моментов, 12 сѐ уште се активни, шест се под контрола, а 35 се изгаснати, соопшти утрово Центарот за управување со кризи (ЦУК).
![Вкупно 53 пожари на отворено вчера, 12 сѐ уште активни](https://mia.mk/images/20240816085209_big_730x400_23.webp )
Скопје, 16 август 2024 (МИА) - Вкупно 53 пожари на отворен простор низ државава се евидентирани во текот на вчерашниот ден. Од нив во моментов, 12 сѐ уште се активни, шест се под контрола, а 35 се изгаснати, соопшти утрово Центарот за управување со кризи (ЦУК).
Според соопштеното, три од активните пожари се на територија на општина Македонски Брод. По два се водат како активни во општините Кичево и Чашка. Огнените јазици се активни и во регионот на општините Дебар, Долнени, Новаци, Пласница, Ресен.
Од оние пожари под контрола, првиот е во општина Демир Хисар, на Илинска - Плакенска Планина, кај селата Вирово и Слоештица, каде опожарена била ниска вегетација. Вториот е во општина Битола, на територија на село Острец, каде опожарени биле сува трева и густа мешана шума. Мешана шума била опожарена и во пехчевското село Негрово, како и на територија на општина Чашка, кај селата Папрадиште и Ореше. Под контрола е ставен и пожарот на депонијата во општина Делчево. Букова шума горела меѓу селата Болно и Илино во ресенскиот регион. бд/са/
Фото: МИА архива