Вашингтон, 22 септември 2023 (МИА) – Демократскиот американски сенатор од Њу Џерси, Роберт Менендез и неговата сопруга се обвинети за примање мито во готовина, златни прачки и луксузни автомобили за серија коруптивни дејствија, вклучително и користење на неговото влијание врз Комитетот за надворешни работи на Сенатот, со кој тој претседава, во корист на авторитарна влада на Египет.

При претресот на домот на обвинетата двојка се пронајдени 100.000 долари во златни прачки и 480.000 долари скриени пари, соопштија обвинителите, кои ги објавија обвиненијата речиси шест години откако претходната кривична постапка против него заврши поради неодлучна порота.

Сенатот соопшти дека Менендез е првиот сенатор во историјата на САД кој е обвинет за две неповрзани кривични дела. Менендез се соочува со реизбор следната година во обид да ја продолжи својата тридецениска кариера во Вашингтон.

Во обвинението се наведува дека Менендез дал чувствителни информации на американската влада и презел други чекори за тајно да му помогне на Египет, вклучително и пишување писмо во име на Египет во кое ги повикува другите сенатори да го укинат ембаргото за помош од 300 милиони долари за земјата.

Сега, откако е обвинет, Менендез ќе мора да се повлече од функцијата претседател на Комитетот за надворешни работи на Сенатот. Согласно правилата на Демократскиот клуб во Сенатот, секој член кој е обвинет за криминал мора да се повлече од лидерската позиција. јт/

Фото: Менендез на Х