Софија, 5 февруари 2025 (МИА/БТА) - Речиси половина милијарда лева ќе бидат инвестирани во 5G поврзување во Бугарија до средината на следната година. Ова го изјави вицепремиерот и министер за транспорт и врски Гроздан Караѓов на форумот на магазинот Економист посветен на развојот на бугарската економија. Проектот ќе ја подобри поврзаноста во 140 општини и 16 гранични премини, се вели во соопштението од Министерството за транспорт и врски.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

„Инвестициите во дигиталната инфраструктура се важен приоритет, ова вклучува поврзување 5G за паметни патишта и дигитални мрежи базирани на облак кои поддржуваат високотехнолошки транспортни решенија“, посочи Караѓов. Според Извештајот за дигиталната деценија за 2024 година, Бугарија е еден од лидерите во Европската унија во фиксното поврзување, со 88,6% од домаќинствата кои имаат пристап до фибер линии, во споредба со просекот на ЕУ од 64%. Сепак, покриеноста со 5G во Бугарија останува под просекот на ЕУ. Дигиталните мрежи се нерамномерно распоредени, особено во ретко населените области каде што операторите немаат пазарни стимулации за изградба на инфраструктура.

„Претстојната инвестиција во брз интернет значително ќе го подобри животот на луѓето во оддалечените области преку овозможување на далечинско работење, е-здравство, е-образование и е-влада. „Ова е исклучително важно за социјалната и дигиталната вклученост на уште 350.000 Бугари“, рече Гроздан Караѓов.

Тој посочи дека во 2024 г 9,3% од Бугарите никогаш не користеле интернет. За да се промени ова, работиме заедно со телекомуникацискиот бизнис, додаде министерот.

Во товарниот транспорт, интеграцијата на информациските системи е неизбежна. „Во моментов, преместувањето на производот од точката А во точката Б бара еден куп хартиени документи кои се разменуваат помеѓу компаниите и администрацијата. Ова значително го отежнува бизнисот и генерира дополнителни трошоци, особено за малите и средни компании. „За решавање на овој проблем подготвуваме воведување електронска товарна сметка“, додаде министерот Караѓов. Тој информираше дека претстојат измени на Законот за патен транспорт, со кои електронската товарна сметка ќе се изедначи со хартиениот документ.

На форумот на магазинот Економист учествуваа претседателот на Бугарија Румен Радев, амбасадори, претставници на институции и бизниси.

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.