Тел Авив, 15 јануари 2025 (МИА) - Најмалку 36 лица се убиени додека израелската војска продолжува да го напаѓа Појасот Газа и покрај широко распространетите надежи за договор за прекин на огнот во Катар, се наведува во денеска објавен палестински извештај.

Палестинска новинска агенција објави за десетици загинати и повредени во новите израелски операции низ различни делови на главно уништениот крајбрежен појас.

Во соопштението на израелската војска се вели дека во рок од 24 часа „погодила повеќе од 50 терористички цели низ Појасот Газа, вклучително и терористички ќелии, складишта за оружје, подземна инфраструктура, позиции против тенковски оган и воени структури на Хамас“.

Во текот на ноќта, воздухопловните сили нападнаа „командно-контролен центар“ лоциран во поранешна училишна зграда во Дарај Туфах, каде што беше присутен терорист „кој служел на централна позиција“.

Од почетокот на војната во Газа по масакрот на исламистите на Хамас во Израел на 7 октомври 2023 година, според палестински извори, повеќе од 46.600 луѓе се убиени во крајбрежниот појас. Повеќе од 110.000 се повредени, наведуваат изворите.

Израелската војска соопшти дека прави се за да избегне цивилни жртви.

Катарски претставници вчера објавија дека Израел и Хамас се до најблиската точка до постигнување договор за прекин на огнот во Газа за ослободување на десетици заложници. рп/

Фото: МИА архива