Скопје, 5 септември 2023 (МИА) - Во рамки на одбележување на Деновите на македонската култура во градот Шибеник, Република Хрватска, кои почнаа во саботата на 2 септември, на отворањето од страна на раководството на Македонско-хрватската тангента се доделија наградите за достигнувања во унапредување на соработката помеѓу двете земји на повеќе полиња. Меѓу добитниците на овие признанија се градоначалникот на општината Шибеник Жељко Буриќ, директорот на шибеничкиот музеј Жељко Крнчевиќ и Љупчо Јаневски директор на Агенцијата за промоција и поддршка на туризмот на Република Северна Македонија.
 
-Туристичката и културната дипломатија уште еднаш ги покажаа своите можности и моќи во поврзување на народите и градењето на мостови на соработка, а коишто треба секојдневно да се зацврстуваат како нишка на комуникација помеѓу хрватскиот и македонскиот народ на полето од туризмот и културата. Не смееме да останеме рамнодушни на позитивната енергија која ја наметна Македонско-хрватската тангента, нејзините членови и нивната неуморна работа во остварување на визијата која е исправена пред нив. Наше е да работиме и помогнеме во достигнување на уште поголеми височини кои не носат кон трајни вредности помеѓу двата народи, истакна Јаневски.
 
Делегацијата на Агенцијата за промоција и поддршка на туризмот предводена од директорот Јаневски, покрај активностите во рамките на одбележувањето на македонските денови на кутурата во Шибеник оствари средби со градоначалникот на Шибеник, Жељко Буриќ, директорот на Туристичката организација на градот Шибеник, како и средба во општината Примоштен со кој Агенцијата за промоција и поддршка на туризмот има потпишано меморандум за соработка на полето од туризмот.
 
-Овие средби се значајни од аспект на запознавање  со искуствата и практиките во реализација на европските фондови и значајните дела кои  во последните десет години градот Шибеник  ги реализираше во подобрување на туристичката клима во дестинациите, овозможувајки троцифрен раст на туристичкото влијание врз локалниот економски развој, наведува АППТ и најавува дека заедно со тимовите на овие општини ќе подготвува проектна документација за аплицирање на многубројните европски фондови, со цел зајакнување на  капацитетите на туристичките производи и инфраструктурата во руралните средини. мч/ев/

фото: МИА архива