Доха, 17 февруари 2025 (МИА) - Српскиот тенисер, Новак Ѓоковиќ ја опиша тримесечната суспензија на светскиот рекет број еден Јаник Синер поради допинг како „неправедна“.

-Се чини дека можеш да влијаеш на исходот ако си врвен играч и имаш пристап до најдобрите адвокати. Синер и Швионтек се невини, тоа е докажано. Случаите привлекоа големо внимание и тоа секако не е во интерес на нашиот спорт. Разговарав со голем број играчи во соблекувалната не само во последните неколку дена, туку и во претходните месеци. Повеќето од нив се незадоволни од тоа како се одвивал целиот процес. Ова е неконзистентно и одлуката изгледа многу неправедна. Тоа е сè што можам да кажам за ова прашање. Време е навистина да се справиме со системот. Јасно е дека структурата не работи како што треба, рече Ѓоковиќ.

Новак Ѓоковиќ и Шпанецот Фернандо Вердаско во двојки забележаа успешен старт на АТП-500 турнирот во Доха (Катар). Тие во првото коло ги победија Казахстанецот Александар Бублик и Русинот Карен Хачанов - 6:1, 6:1 за 50 минути игра. дс

Фото: Архива