Скопје, 11 јануари 2025 (МИА) - Цароградскиот патријарх г.г. Вартоломеј испрати честитка до Архиепископот Охридски и Македонски г.г. Стефан, по повод неговиот именден. Вашиот именден, се наведува во честитката до г.г Стефан „дава повод да ги пофалиме: Вашата непоколеблива верност кон Светата Христова Велика Црква, ненамалениот интерес за богољубивото функционирање на црковните работи, и Вашата добра борба за христоподобното сведоштво во светот со благонаклонливо уво за знаците на времињата“.

Во продолжение ја пренесуваме содржината на честитката:

„Преосвештен Архиепископе Охридски, во Светиот Дух возљубен брату и сослужителу на нашата Смиреност, господине Стефане, благодат и мир од Бога на вашето Преосвештенство.

Заедно радувајќи се во одбележувањето на Вашиот именден, Ви ги упатуваме срдечните поздрави и честитки на Вселенската Патријаршија и од мене лично.

За полнотата на православните, празниците се време за славословие на дародавецот Бог, Кој сè гледа. Истовремено, тие се прилика за општење и заедничарење во животот и во радоста, за духовно обновување и за егзистенцијално хранење. Вашиот именден дава повод да ги пофалиме: Вашата непоколеблива верност кон Светата Христова Велика Црква, ненамалениот интерес за богољубивото функционирање на црковните работи, и Вашата добра борба за христоподобното сведоштво во светот со благонаклонливо уво за знаците на времињата.

Во овој дух, молејќи Му се на нашиот Бог и Спасител Исус Христос да Ви дарува крепко здравје, неуморна сила и секој вишен благослов, за плодно продолжување, што подолго, на Вашата црковна служба, во слава на името на Оној Кој е над секое име, ве целиваме со свет целив и остануваме со исклучителна чест и со длабока љубов во Господа.

На многу години, Преосвештен брате!“ ев/

ФОТО: МИА Архива