Брисел, 26 септември 2023 (МИА) – Холандија ќе покрене истражување чија цел ќе биде да се најде механизам за намалување на разликите во цените на основните намирници во ЕУ и да се обезбеди „фер“ европски пазар, најави холандската министерка за економија Мики Адријансенс.

- Секогаш ќе има одредени разлики во цените, но сакаме фер пазар. Во Европа имаме голем единствен пазар од кој сите сакаме придобивки, но тоа ќе мора да биде видливо во супермаркетите, ијзави Адријансенс во интервју за холандското радио БНР.

Таа нагласи дека ова прашање го покренала на вчерашното заседание на Советот за конкурентност на ЕУ во Брисел, при што добила поддршка од нејзините колеги од Белгија и Луксембург, Пјер-Ив Дермањ и Франц Фајо.

Според Адријансенс, набавните цени на намирниците за трговците на мало во Германија се пониски од оние во трите земји на Бенелукс, што ги става германските продавачи во конкурентска предност и ги намалува трошоците на потрошувачите.

Таа истакна дека не бара утврдување на фиксни продажни цени на ниво на ЕУ, но смета дека со правилата на Унијата за храната и за стандардите на производите може да се обезбеди „поправеден терен за игра“ за сите земји членки.

- Тие (правила) варираат од земја до земја, што исто така е една од причините зошто има разлики во цените на производите, додаде Адријансенс.

Индексите на трошоците на домаќинствата во трите земји на Бенелус – Белгија, Луксембург и Холандија се повисоки од просекот на ниво на ЕУ. Во 2022 година, тој во Белгија бил за 14,8 отсто повисок од просечниот европски индекс на трошоците на домаќинства, во Холандија за 16,7, а во Луксембург за дури 36,8 проценти.

Адријансенс очекува резултатите од истражувањето да бидат објавени пред крајот на оваа година. сп/

Фото: МИА Архива