Правото на заштита за време на бременост, раѓање и родителство дел од измената на Правилникот на ФФМ
- Фудбалската федерација на Македонија направи измени во Правилникот за регистрација, статус и трансфер на фудбалери, а кои се однесуваат на специфичните работни услови на професионалните фудба
![Правото на заштита за време на бременост, раѓање и родителство дел од измената на Правилникот на ФФМ](https://mia.mk/index.php/images/20221108212227_big_730x400_37.webp )
Скопје, 28 октомври 2021 (МИА) - Фудбалската федерација на Македонија направи измени во Правилникот за регистрација, статус и трансфер на фудбалери, а кои се однесуваат на специфичните работни услови на професионалните фудбалерки во време на бременост, со што се заштитува едно од основните права кои ги имаат жените како посебна заштита во работниот однос, а тоа е правото на заштита за време на бременост, раѓање и родителство.
Со измените, фудбалерката која го искористила породилното отсуство, може да биде регистрирана, односно да склучи професионален договор и надвор од преодниот рок, во зависност од одредбите на самиот договор со кој фудбалерката заминала на породилно отсуство и имајќи го во предвид спортскиот интегритет на натпреварувањето.
Фудбалерките имаат право на породилно отсуство за време на склучениот професионален договор со клубот со надомест од 2/3 од висина на платата која ја добиваат според самиот договор, а кога се вратени од породилно отсуство, во период на извршување на клупските обврски, треба да им се овозможи доење на бебето. За таа цел клубот треба да обезбеди соодветен простор според законските прописи и регулативи.
Се посочува дека бременоста, породилното отсуство или користењето на правата кои произлегуваат од мајчинството, генерално не смеат да бидат условени со одредбите на професионалниот договор склучен меѓу клубот и фудбалерот во женска конкуренција. Па така, доколку клубот го раскине договорот со фудбалерката поради бременост, забременување, породилно отсуство или користење на правата кои произлегуваат од мајчинството, генерално, ќе се смета дека договорот е раскинат од страна на клубот без соодветна причина, освен доколку не се докаже спротивното.
Дополнително, доколку договорот е прекинат поради оваа причина, клубот треба да ја обештети фудбалерката доколку самата не склучила договор со нов клуб или во случај во периодот на донесувањето на одлука, фудбалерката склучила нов договор на клубот.
Покрај обврската на клубот кој еднострано го раскинал договорот со фудбалерот да изврши исплата на надоместок, ќе му биде изречена и санкција за забрана на регистрација на фудбалери на два цели и последователни преодни рокови. Клубот ќе може да регистрира нови фудбалерки исклучиво по истекот на спортската санкција. ар/лв/