Охрид, 20 декември 2024 (МИА) – Општинската организација на Црвениот крст од Охрид и Одделението за превенција при СВР – Охрид организираат серија здравствено-превентивни активности за ризиците од употребата на пиротехнички средства.

Волонтери на Црвениот крст и полициски службеници утре на Градскиот плоштад „Св. Климент Охридски“ од 12 часот ќе делат едукативни материјали за опасностите и последиците од користењето на петарди и други пиротехнички средства, со нагласок на казнивоста од нивна употреба.

Парамедици на Црвениот крст ќе изведат и симулациска показна вежба на повредени од експлозија на петарди со приказ на повреди на екстремитети од експлозијата и укажување на прва помош при таква повреда.

„Петардите не се играчка“ е пораката што организаторите на овој настан ја упатуваат до децата, но и до родителите, со апел за грижа за безбедни Новогодишни и Божиќни празници.

Слични активности наредните денови ќе бидат реализирани и во дел од основните училишта во Охрид. аб/са/

Фото: МИА