Исламабад, 24 април 2025 (МИА) - Исламабад денеска објави серија одмазднички мерки како одговор на одлуките што Индија ги донесе вчера во врска со смртоносниот напад во Кашмир, што го припиша на Пакистан.

Пакистанските цивилни и воени лидери денеска се состанаа два часа, а на крајот од состанокот кабинетот на премиерот Шехбаз Шариф најави неколку мерки против соседната земја.

Овие мерки означуваат натамошна ескалација на тензиите меѓу двете земји, кои се нуклеарни сили, по нападот во вторникот.

-Секоја закана за суверенитетот на Пакистан и безбедноста на неговиот народ ќе добие цврст реципрочен одговор, предупреди Комисијата за национална безбедност.

„Советниците на индиската одбрана, морнарицата и воздухопловните сили во Исламабад се прогласени за персона нон грата. Целата трговија со Индија, вклучително и од и кон трети земји кои транзитираат низ Пакистан, е суспендирана со моментален ефект“, се додава во соопштението.

Покрај тоа, пакистанскиот воздушен простор „ќе биде веднаш затворен за сите авиони во сопственост или управувани од Индија“.

Како одговор на слична мерка наметната од Делхи вчера, „Пакистан ги укинува и ги поништува сите визи издадени на индиски државјани со моментален ефект, освен визите за верските аџии Сики“.

„Индиските граѓани во моментов во Пакистан имаат 48 часа да ја напуштат земјата“, се вели во соопштението, во кое се додава дека главниот граничен премин меѓу двете земји сега е затворен за сообраќај во двата правци.

Главното спорно прашање меѓу двете земји, сепак, останува проблемот со водата, кој е критично важен во овој регион, кој е сериозно загрозен од сушата и климатските промени.

Вчера Делхи објави дека го поништува договорот за споделување на водата за реката Инд потпишан во 1960 година, кој никогаш не бил доведен во прашање и покрај трите војни меѓу двете соседни земји.

Индија ја оправда својата одлука со обвинување на Исламабад за „поддршка на прекуграничен тероризам“. Индиската полиција објави дека трага по двајца пакистански напаѓачи.

Сè уште никој официјално не ја презел одговорноста за неселективното пукање во кое загинаа 26 лица во вторникот, а Пакистан го обвини Делхи дека „го обвинува без докази“.

„Секој обид за намалување или пренасочување на протокот на реката Инд, која му припаѓа на Пакистан во согласност со Договорот за водите на Инд, и секој обид за погазување на правата на крајбрежните области, ќе се смета за акт на војна и ќе наиде на силен одговор“, предупреди Исламабад. мс/

фото: МИА архива