Скопје, 10 октомври 2023 (МИА) - Општина Центар организира по првпат музички хепенинг насловен „Нешто што ќе остане“ кој ќе се случи вечер во Паркот на Франкофонијата, со почеток од 19 часот.

Станува збор за нова музичка приказна која се очекува, како што најавуваат од локалната самоуправа, да стане обележје на центарци па и главниот град - концерт на кој ќе настапат Ди Џеј Чваре, Дани Димитровска, Тамара Тодевска, ДНК, Некст Тајм и Ди-џеј Фиц, а целиот настан ќе го води и збогатува нашата центарка Вера Јанковиќ.

Градоначалникот на Општина Центар Горан Герасимовски вели дека недостигаат културни манифестации кои будат насмевки и дружење кај луѓето затоа општината дава свој придонес за забава, уживање и афирмација на македонската музика.

-Општина Центар, како најурбана општина се стреми да ја подигне културата на повисоко ниво и сака да даде свој придонес во афирмирање на македонската музика, брендирање на општината и нашата земја преку испишување на нова музичка приказна. „Нешто што ќе остане“ е таа приказна која ќе ни донесе нова свежина, нова енергија и позитивни чувства кои некако како да ги оставивме настрана. Верувам дека ова ќе биде почеток на една нова емоција на задоволство која недостигаше, ново обележје по кое ќе не препознаваат и нова традиција на општината. Затоа ги повикувам сите граѓани да ни се придружат и заедно да одбележиме една нова приказна со „Нешто што ќе остане, вели Герасимовски.

Општина Центар, се додава, работи на сите сфери за да ги задоволи потребите на сите категории граѓани.

-Музичкиот хепенинг „Нешто што ќе остане“ е нешто од тие пред нас, нешто што ќе остане за нас и нешто што ќе остане за оние што доаѓаат по нас. Заедно да создадеме уште едно неповторливо доживување, повикуваат на дружба од Општина Центар. вг/аа/

Фото: Општина Центар