Скопје, 30 ноември 2023 (МИА) - Народната банка објавува повик за пријавување трудови за 49. сесија на Клубот на истражувачите, којашто ќе се одржи на 21 декември 2023 година (четврток), со почеток во 14:00 часот, во просториите на Народната банка.

Заинтересираните истражувачи , како што информираат од Народна банка, може да се пријават со доставување на материјалот на е-адресата: info@nbrm.mk, најдоцна до 11 декември 2023 година.

Трудовите треба да бидат изработени согласно со трендовите и стандардите на современите истражувања, што подразбира емпириска анализа, како и систематизирани заклучоци од истражувањето.

На сесиите на Клубот како платформа за дискусија и размена на стручни мислења, може да се презентираат резултати и сознанија и од истражување/труд во работна верзија.

Клубот на истражувачите на Народната банка е отворена платформа за презентација и дискусија на научноистражувачки трудови, особено во доменот на монетарната политика и макроекономијата.

Зачленувањето во Клубот на истражувачите е од отворен карактер. дма/са/

Фото: Народна банка