Крива Паланка, 5 септември 2021 (МИА) - Над петстотини и педесет учесници од сите краеви на државата учествуваа на дводневното летно офф-роад рели низ Осоговските Планини што се одржа вчера и денеска. Организатори на настанот што се реализира втора година по ред се шестмина кривопаланчани: Славчо Стојановски, Синиша Давидовски, Младенчо Димчовски, Стефан Вучевски, Даниел Николовски и Горан Стоименовски кои го формираа здружението „Офф-роад Екстриме Крива Паланка“ со цел промоција на убавините на природата на овој крај од Североисточниот дел на Република Северна Македонија. - Двата дена поминаа во одлична дружба, прекрасна енергија и адреналин. Задоволни сме што иако вторпат се одржува настанот, привлече внимание на над 550 љубители на екстремните спортови, природата и авантурите од целата држава и од сите возрасти. Имавме млади учесници во тимовите, најмладите на само десетгодишна возраст, а највозрасните беа во седмата деценија од животот. Интересен е фактот што овој авантуристички настан годинава го посетија и повеќе припаднички на понежниот пол, што е доказ дека ваквите настани се одлична можност и за уживање во природата, но и за туристичка промоција на овој регион кај целокупната популација. На релито имаше околу 140 џипови и 80-тина мотори и четирицикли, информираат организаторите од „Офф-роад Екстриме Крива Паланка“. Настанот започна вчера наутро, во десет часот, со стартна точка од Мотел „Македонија“ во Крива Паланка, а вкупната должина на рутата беше околу 70,75 километри. - Релито се возеше по прекрасните пејзажни предели на општината, преку маала Дивјанци, селата:  Осиче, Гарваница, Биљино, Луке, Црцорија, Трново, Узем и завршуваме на нашиот познат туристички локалитет Калин Камен, со неколку паузи, а крајот на трасата на првиот ден што се возеше ревијално беше на Калин Камен со организирано кампување во шатори. Вториот ден започна со кружна временска трка во повеќе категории, а на крајот беа доделени благодарници и награди за најдобрите, посочуваат од „Офф-роад Екстриме Крива Паланка". Настанот го поддржуваа 50-тина спонзори, локални фирми и вљубеници во екстремните спортови и природата. ид/мс/