Министерот Спасовски и директорот на БЈБ Тасевски на ручек со децата и семејствата на загинатите припадници на полицијата
- Министерот за внатрешни работи, Оливер Спасовски и директорот на Бирото за јавнa безбедност Сашо Тасевски денеска ги посетија децата и семејствата на загинатите припадници на полицијата во од
![Министерот Спасовски и директорот на БЈБ Тасевски на ручек со децата и семејствата на загинатите припадници на полицијата](https://mia.mk/index.php/images/20221112050041_big_730x400_76.webp )
Скопје, 12 февруари 2022 (МИА) - Министерот за внатрешни работи Оливер Спасовски и директорот на Бирото за јавнa безбедност Сашо Тасевски денеска ги посетија децата и семејствата на загинатите припадници на полицијата во одморалиштето на МВР во Пониква, Кочани, каде имаа заеднички ручек и дружење во рамки на неколкудневниот престој на децата во одморалиштето.
На средбата, министерот Спасовски изразил задоволство што повторно има можност да се сретне со децата и семејствата на загинатите припадници на МВР, активност што веќе прерасна во традиција, и да поразговараат за актуелни прашања од важност за нив.
Спасовски и во оваа пригода, се наведува во соопштението од МВР, истакнал дека тој и раководството на МВР се нивни пријатели и поддржувачи и оти партнерството со здружението „Херои на Македонија 2001-2015“ и сите негови членови продолжува и во иднина.
- Нема држава во чиишто темели не се вградени и животите на нејзините најдобри синови. Тоа со што нашите херои нѐ задолжија, се враќа само со дела, со хумани, професионални и благородни дела, со сѐ она добро, чисто и честито поради што тие воопшто и ги положија своите животи. Ова ме задолжува мене како министер, раководството на Министерството за внатрешни работи, но и сите останати институции да бидеме секогаш тука за вас, како нивни најблиски, и да направиме сѐ што е во наша надлежност, кога за тоа постои законска основа, да одговориме позитивно на вашите барања, рекол министерот Спасовски денеска пред децата и семејствата на загинатите припадници на МВР во Пониква. цр/хс/
![Спасовски ПОниква 1](/articles/images/%d0%bc%d0%b8%d0%bd%d0%b8%d1%81%d1%82%d0%b5%d1%80%d0%be%d1%82-%d1%81%d0/7biTjXW7q/placeholder.webp?use_watermark=0)
![Спасовски Пониква 2](/articles/images/%d0%bc%d0%b8%d0%bd%d0%b8%d1%81%d1%82%d0%b5%d1%80%d0%be%d1%82-%d1%81%d0/Ph4oIpCv4/placeholder.webp?use_watermark=0)