Маричиќ: Имаме политичка волја да обезбедиме судски систем по европски стандарди
- Експертизата, препораките и советите кои ги слушнаа македонските работни групи од Европската комисија ќе бидат добар водич во подготовките за билатералниот скрининг за Поглавјето 23 - „Правос
![Маричиќ: Имаме политичка волја да обезбедиме судски систем по европски стандарди](https://mia.mk/index.php/images/20221113231347_big_730x400_59.webp )
Скопје, 27 септември 2022 (МИА) - Експертизата, препораките и советите кои ги слушнаа македонските работни групи од Европската комисија ќе бидат добар водич во подготовките за билатералниот скрининг за Поглавјето 23 - „Правосудство и фундаментални права“, изјави денеска вицепремиерот задолжен за европски прашања Бојан Маричиќ на последниот објаснувачки состанок од Кластерот „Темели“ посветен на ова поглавје.
- Институциите и администрацијата имаат мотивација, а Владата политичка волја за да продолжат реформите во правосудството и да обезбедиме за граѓаните судски систем кој ќе функционира по европски стандарди, напиша на својот Фејсбук профил Маричиќ, кој воедно е и главен преговарач со ЕУ.
Според Маричиќ, напредокот во областа владеење на правото ќе биде јасен показател за текот на преговарачкиот процес и дека македонскиот преговарачки тим и тој, како поранешен министер за правда, одлично го знаат предизвикот кој ќе го имаат во ова поглавје.
- Направивме поместувања во функционирањето на правосудниот систем, но ова е област во која ќе имаме уште работа и која секогаш има простор за подобрување, додаде Маричиќ.
Како што соопшти Секретаријатот за европски прашања, со денешното завршување на објаснувачкиот состанок за Поглавјето 23 - „Правосудство и фундаментални права“ во Брисел, е заокружен објаснувачкиот скрининг за Кластерот 1 - „Темели“.
Билатералните состаноци за поглавјата и областите од овој Кластер ќе се одржат во ноември и декември годинава.
- Овој кластер важи за најважната област во процесот на преговори со Европската Унија, имајќи предвид дека содржи поглавја поврзани со демократските институции, владеењето на правото, политичките и економските критериуми, реформата на јавната администрација, јавните набавки, финансиската контрола и статистиката. Од постигнувањето на потребниот напредок во овој кластер ќе зависи отворањето на други кластери, додаваат од СЕП.
Скрининг процесот продолжува со објаснувачките состаноци за поглавјата од Кластер 2 - „Внатрешен пазар“, кои ќе започнат во првата половина на месец октомври. сп/
![Маричиќ скрининг Брисел 2](/articles/images/%d0%bc%d0%b0%d1%80%d0%b8%d1%87%d0%b8%d1%9c-%d0%b8%d0%bc%d0%b0%d0%bc%d0/ziGTJN90W/placeholder.webp?use_watermark=0)