Атина, 29 септември 2024 (МИА) – На 107 позиција, од 193 земји, тимот од Северна Македонија го заврши учеството на светскиот натпревар по роботика „FIRST Global Challenge“ во Атина што започна во четвртокот и заврши попладнево, јави дописничката на МИА од Атина.

Средношколците, оваа година заедно со нивните роботи имаа задача да најдат одржливи решенија преку инженерството и роботиката за глобалните проблеми меѓу кои и справување со кризата со храна.

Најголем број поени доби тимот на Казахстан, а веднаш потоа и учениците од Обединетите Арапски Емирати и од Кина.

Учениците Димитриј Митковски, Елени Трпковска, Давид Маневски, од средното училиште „Георги Димитров“, ученикот Тимотеј Николовски од „Михајло Пупин“ и Марко Јанкуловски од средното училиште „Јахја Кемал“, беа дел од македонскиот тим и за нив ова беше нивно прво учество на конкретниот светски натпревар, а беа предводени од двајцата ментори, кои веќе имаат искуство од претходните години.

На „FIRST Global Challenge“ учествуваа со „Експлозивниот ајвар“, како што е името што му го дале на роботот, а генерално се задоволни од настапот во изминатите три дена.

Грција за првпат беше домаќин на роботската Олимпијада, а грчкиот премиер Кирјакос Мицотакис вчера го посети стадионот „Мир и пријателство“, каде што се одржуваат натпреварите, а на учениците им порача дека натпреварот не е само да се изработи најдобриот робот или да се победи, „туку е средба со други луѓе, градење пријателства и разбирање на вредноста на соработката и почитта“.

„FIRST Global Challenge“ започна со свечено отворање во четвртокот на историскиот антички олимписки стадион „Панатенаик“ во центарот на Атина, каде што се одржаа и првите модерни Олимписките игри. ср/лв/

Фото: МИА