Делчево, 5 септември 2025 (МИА) - Во рамки на одбележувањето на Денот на ослободувањето на Делчево – 7 Септември и Денот на независноста на Македонија – 8 Септември, вечерва во фоајето на Спомен-домот во Делчево се одржа концерт на соло-гитара на Дејан Лазаревски.

Пред бројната публика Лазаревски се претстави со разновидна програма составена од дела на познати светски автори, меѓу кои композиции од класичната, но и од современата музичка литература за гитара. Со својот впечатлив настап, уметникот успеа да создаде топла и интимна атмосфера, која публиката ја награди со аплаузи.

Лазаревски истакна дека за него претставува особена чест и задоволство што по втор пат настапува во Делчево. 

-Секој настап овде е уникатно доживување. Делчевската публика е отворена и искрено реагира на музиката, што мене како уметник ме исполнува и мотивира, изјави тој по концертот.

Организатор на настанот беше Националната установа Центар за култура „Никола Јонков Вапцаров“ – Делчево. Директорот на установата, Златко Начовски нагласи дека Центарот и во иднина ќе продолжи да организира вакви културни содржини. 

-Нашата цел е да ја доближиме класичната музика и уметноста до пошироката публика и да создадеме традиција на вакви концерти во Делчево, рече Начовски.

Концертот е дел од програмата со која Делчево ги одбележува двата значајни празника – 7 Септември, Денот на ослободувањето на градот и 8 Септември, Денот на независноста на Македонија. вс/фф/

Фото: МИА