Атина, 28 ноември 2023 (МИА) – Канадската актерка со грчко потекло Ниа Вардалос, позната од филмот „Мојата голема дебела грчка свадба“, преку Инстаграм упати порака до Британскиот музеј да ѝ ги врати на Грција скулптурите од Партенон, јави дописничката на МИА од Атина.

Вардалос напиша дека би ценела доколку Британскиот музеј ги врати „украдените скулптури во Партенон, онаму каде што припаѓаат“.

„П.С. Ќе дојдам да ги земам, имам голема чанта“, напиша Вардалос.

Случајот со скулптурите од Партенон од вчера е главна тема во Грција, откако токму поради грчкиот став дека треба да се вратат во Атина, британскиот премиер Риши Сунак реши да ја откаже средбата во Лондон со грчкиот премиер Кирјакос Мицотакис.ср/сд/