Златна мимоза за „Домаќинство за почетници” на Горан Столевски
- СООПШТЕНИЕ: „Домаќинство за почетници” по сценарио и во режија на Горан Столевски, а во продукција на Лист Продукција, ја освои наградата златна мимоза за најдобра режија на филмскиот фестивал во Херцег Нови, кој се одржа од 23 до 29 август 2024.
![Златна мимоза за „Домаќинство за почетници” на Горан Столевски](https://mia.mk/index.php/images/20240830134350_big_730x400_5.webp )
Скопје, 30 август 2024
„Домаќинство за почетници” по сценарио и во режија на Горан Столевски, а во продукција на Лист Продукција, ја освои наградата златна мимоза за најдобра режија на филмскиот фестивал во Херцег Нови, кој се одржа од 23 до 29 август 2024.
„Домаќинство за почетници” беше дел од натпреварувачката програмата за долгометражни играни филмови, а за нагрдата одлучуваше жирито во состав: Лордан Зафрановиќ, Пјер Жалица и Павле Симоновиќ.
Златната мимоза е четрнаесетата награда за филмот „Домаќинство за почетници“, кој досега е прикажан на повеќе од 70 фестивали ширум светот, а е дистрибуриан во кината во Америка, Австралија, Холандија, Хрватска, Полска, Македонија.
Светската премиера на „Домаќинство за почетници” се одржа во 2023 на филмскиот фестивал во Венеција, а македонската премиера беше на минатогодишното отварање на Интернационалниот фестивал на филмската камера, „Браќа Манаки“. Филмот беше избран за македонски кандидат за наградата „Оскар за најдобар долгометражен интернационален филм“ за 2023 година, а беше дел и од селекцијата за Европските филмски награди, каде доби една номинација.
Дистрибутер на филмот на територија на САД е Focus Features, Universal Pictures е интернационален дистрибутер за останатите територии, а продажните агенти на филмот New Europe Film Sales од Полска го застапуваат филмот на територија на југоисточна Европа.
„Домаќинство за почетници” е финансиски поддржан од Агенцијата за филм на Република Северна Македонија и е копродукција помеѓу Северна Македонија, Полска, Хрватска, Србија и Косово, со учество и на партнери од Шведска, Австралија и САД.
Лист Продукција
__________________________________________________________
МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.
Фото: Филмски фестивал во Херцег Нови