Скопје, 5 август 2021 (МИА) - Евроамбасадорот Дејвид Гир, денеска и утре во рамки на кампањата „ЕУ со ТЕБЕ“, ќе престојува во Југоисточниот плански регион, каде ќе ги посети општините Босилово, Струмица, Дојран и Конче. Гир, заедно со заменикот министер за земјоделство Трајан Димковски и градоначалникот на Босилово, Зоран Зимбаков, денеска ќе го посети испустот на браната Чаушица, што е реконструиран со финансиска помош од ЕУ. Во Струмица, евроамбасадорот Гир ќе се сретне со претставници на граѓанските организации и млади активисти во Европската куќа, но и со локални уметници и новинари. Утре, заедно со дојранскиот градоначалник Анго Андов ќе ги посети двата проекти што ги финансираше ЕУ во рамки на Програмата за локална и регионална конкурентност - Градскиот парк и Отворената летна сцена во Дојран. Воедно, со градоначалникот на Конче, Благој Илиев ќе ги посети реконструираниот пат и планинарските патеки во оваа Општина. вј/сп/