Брисел, 3 ноември 2025 (МИА) – Во рамки на Неделата на родова еднаквост, од денеска до петок, Европскиот парламент ќе организира серија настани и дебати посветени на стеснување на јазот на родовата нееднаквост во образованието и на создавањето услови за рамноправен кариерен напредок на жените. 

Се очекува во дискусиите да стане збор не само за прашањето на праведност и еднаквост меѓу половите, туку и за можностите за користење на талентот на жените преку образованието, обуката и вработувањето за да се поттикне економскиот раст и напредок. 

Потпретседателката на Европскиот парламент Антонела Сберна, која е задолжена за реализација на програмата за одбележување на Неделата на родова еднаквост, порача дека задача на ЕУ треба да биде уривање на половите бариери, кои повеќе не треба да постојат. 

- Иднината на Европа зависи од нашата способност да го негуваме талентот: од училниците до управните одбори, од лабораториите до парламентите. Европа мора да стане место каде што секој талент може да напредува, рече Сберна. 

Од поважните настани, за утре попладне е предвидена дебата на тема „Соочување со јазот меѓу талентите: Создавање услови за блеснување на секој талент“, на која е најавено учество на извршната потпретседателка на Европската комисија за технолошки суверенитет, безбедност и демократија Хена Виркунен, генералната секретарка на Европскиот економски и социјален комитет, Изабел Ле Гало Флорес, како и на неколку жени вработени во научно-истражувачки и образовни институции. 

В среда ќе се одржи расправа за женското лидерство во политиката во парламентарниот Комитет за правата на жените и родова еднаквост, на која ќе присуствува и претседателката на Парламентот, Роберта Мецола. 

Европскиот парламент секоја година ја одбележува Неделата на родовата еднаквост со организација на серија настани посветени на промовирање на правата на жените и девојчињата и на постигнување на родова еднаквост. Одбележувањето на Неделата на родовата еднаквост на ваков начин започна во 2020 година. сп/ 

Фото: Европски парламент