Давид Бабунски потпиша за Данди Јунјатед
- Шкотскиот фудбалски прволигаш Данди Јунајтед го комплетираше денеска трансферот на македоскиот репрезентативец Давид Бабунски од унгарски Мезоковеш.
![Давид Бабунски потпиша за Данди Јунјатед](https://mia.mk/index.php/images/20240716160423_big_730x400_43.webp )
Данди, 16 јули 2024 (МИА) – Шкотскиот фудбалски прволигаш Данди Јунајтед го комплетираше денеска трансферот на македоскиот репрезентативец Давид Бабунски од унгарски Мезоковеш.
Давид Бабунски (30) со шкотскиот клуб потпиша договор на една година со можност за продолжување на соработката за уште една сезона.
„Длабоко сум благодарен за довербата што клубот ми ја укажа. Трпеливо чекав ова да се финализира и го одложив одговорот на другите понуди бидејќи со нетрпение чекав можност како што е оваа. Доаѓањето во земја во која фудбалската култура е голема и стандардот на лигата е висок, се дел од работите што ме мамат, а веќе ја чувствувам големината на клубот. Ќе биде голем предизвик за мене, очекувањата за оваа сезона се големи, треба да веруваме дека можеме да направиме нешто посебно“, изјави Бабунски на официјалниот сајт на Данди Јунјатед.
Тренерот на Данди Јунјатед, Џим Гудвин, истакна дека клубот во Давид Бабунски добил големо засилување за претстојната сезона во шкотската Премиерлига.
„Тој е играч што го имавме на нашиот радар подолг временски период, така што запознавањето со соиграчите на тренинзи беше исклучително пријатно. Тој веднаш ги потврди причините поради кои го доведовме во клубот, покажувајќи огромно ниво на техничка способност и желба за импресионирање“, рече Гудвин.
Давид Бабунски, кој потекнува од младинската школа на Барселона, е вториот македонски фудбалер кој идната сезона ќе настапува за Данди Јунјатед, чиј дрес го носи и Кристијан Трапановски. ег ФОТО: Фејсбук