Грција и Кипар и ова лето ќе се поврзат бродски, лани со траектот патувале над 7.000 патници
- Трета година година по ред, за време на летниот период ќе функционира бродската линија што ќе ги поврзе Грција и Кипар, патување со траект што трае 31 час, а лани, во периодот од крајот на мај до септември линијата ја искористиле над 7.000 патници, јави дописничката на МИА од Атина.
![Грција и Кипар и ова лето ќе се поврзат бродски, лани со траектот патувале над 7.000 патници](https://mia.mk/index.php/images/20240416170846_big_730x400_73.webp )
Атина, 16 април (2024) – Трета година по ред, за време на летниот период ќе функционира бродската линија што ќе ги поврзе Грција и Кипар, патување со траект што трае 31 час, а лани, во периодот од крајот на мај до септември линијата ја искористиле над 7.000 патници, јави дописничката на МИА од Атина.
Заменик-министерката за поморство на Кипар Марина Хаѕиманоли на денешната прес-конференција соопшти дека во ланскиот период со траектот патувале 7.407 патници и 455 домашни миленици, а биле превезени 2.496 возила.
- Од овие бројки произлегува дека морската патничка поврзаност ја постигна својата цел, создавајќи нов сегмент на туристичкиот пазар за оние патници кои сакаат да патуваат од и кон Кипар и остатокот од континентална Европа со нивните приватни автомобили и мотори, нудејќи алтернативен начин на превоз, кој над две децении не постоеше, истакна министерката.
Бродот ќе биде истиот што сообраќаше и во изминатите две години, плови под кипарско знаме, патувањето трае 31 час, од Кипар ќе тргнува од пристаништето во Лимасол, а крајната дестинација е атинското пристаниште Пиреас.
Првиот траект ќе тргне на 29 мај од Лимасол, а последниот, на крајот од сезоната ќе тргне од Пиреас на 3 септември.
На средината на јуни 2022 година, по пауза од над 20 години одново беше воведена редовна бродска линија меѓу Грција и Кипар. ср/паг/