Скопје, 8 ноември 2023 (МИА) - Во Скопје денеска ќе се одржи втората годишна конференција за здравство во организација на Комитетот за здравство при Американската стопанска комора во Северна Македонија (АмЧам). Конференцијата е насловена како „Поглед во иднината за нашиот здравствен систем“.

Како што појаснуваат организаторите, конференцијата има за цел да ја пренесе пораката за долгорочно и одржливо проектирање на целокупниот развој на домашниот здравствен систем, со акцент на потребата за подобрување на пристапот до лекови и искористувањето на податоците во креирање на здравствените политики.

- Клучен говорник на овогодинешното издание на конференцијата ќе биде Боги Елијасон, директор за здравство на Институтот за футуристички студии од Копенхаген. Тој важи за еден од најзначајните светски експерти за дизајнирање на здравствени системи со преку 25 години консултантско искуство, работејќи за приватни компании, политичари и јавни институции, а во моментов е ангажиран на подобрување на германскиот здравствен систем, се појаснува во соопштението на организаторите.

На конференцијата предвидено е да се одржат три панел - дискусии, насловени „Пристап до лекови - основен елемент на здравственото право“, „Искористувањето на податоците во креирањето на здравствените политики“ и „Момент на пресвртница: здравствениот систем на Република Северна Македонија“. 

Најавено е учество и на министерот за здравство Фатмир Меџити, директорката на Фондот за здравствено осигурување Магдалена Филиповска Грашкоска, како и на советничката за здравство на премиерот, Ана Данева Маркова. бд/мд/

Фото: Комитет за здравство при Американската стопанска комора во Северна Македонија (АмЧам)