Тирана, 8 октомври 2024 (МИА) - Странските директни инвестиции во Албанија, еден од главните извори за финансирање на економијата и отворање работни места, продолжуваат да растат во првите шест месеци од оваа година.

Министерот за економија, култура и иновации Бленди Гонџа соопшти дека податоците покажуваат стабилен и значителен раст.

- Протокот на странски инвестиции континуирано расте во последните години. За првата половина од годинава странските инвестиции изнесуваат 749 милиони евра, што е за 16 отсто повеќе споредено со истиот период минатата година, изјави Гонџа.

Тие инвестиции, според него, се реализирани во стратешки сектори како што се дејностите со недвижнини, кои учествуваат со 24,1 отсто од вкупниот обем на инвестиции.

Министерот информираше дека кога станува збор за странските инвестиции доминира Турција, која учествувала со 19,5 отсто во вкупниот проток, потоа Италија и Холандија со 12,4 отсто и 8,1 отсто во вкупниот број, како и Франција и Австрија со 7 и 6,6 отсто.

Странските инвестиции минатата година достигнале 1,5 милијарди евра. вт/паг/