Владата ја усвои новата Национална стратегија за правата на лицата со попреченост 2023-2030
- Владата ја усвои Националната стратегија за правата на лицата со попреченост 2023-2030, со Акциски план на Националната стратегија за 2023-2026 година. Како што соопшти владината прес-служба, креирана е со исклучителна партиципативност на лицата со попреченост и нивните организации, а ќе се спроведува со мерки за сите институции и министерства кои се обврзале во неа. За реализација на стратегијата Владата одобри 46 милиони евра.
![Владата ја усвои новата Национална стратегија за правата на лицата со попреченост 2023-2030](https://mia.mk/index.php/images/20231228162822_big_730x400_7.webp )
Скопје, 28 декември 2023 (МИА) - Владата ја усвои Националната стратегија за правата на лицата со попреченост 2023-2030, со Акциски план на Националната стратегија за 2023-2026 година. Како што соопшти владината прес-служба, креирана е со исклучителна партиципативност на лицата со попреченост и нивните организации, а ќе се спроведува со мерки за сите институции и министерства кои се обврзале во неа. За реализација на стратегијата Владата одобри 46 милиони евра.
-Стратегијата е исклучително важна бидејќи ги вклучува сите потреби на сите категории на лица со попреченост за кои тие парцијално се залагаа низ годините. Во стратегијата е прецизирано што се треба да се направи за лицата со попреченост, преку следење и реализирање на мерките и активностите во неа. Оваа стратегија е дел од владината програма, а носител е Министерството за труд и социјална политика, со техничка поддршка на Германската агенција за меѓународен развој, со координација на владиното Национално координативно тело за имплементација на Конвенцијата на ОН за правата на лицата со попреченост и техничко стручна поддршка на сите агенции на Обединетите Нации во земјава, информира прес-службата на Владата.
Во однос на спроведувањето на стратегијата, се наведува во соопштението, вклучени се скоро сите министерства и институции - министерствата за информатичко општество и администрација, за финансии, за правда, за локална самоуправа, за труд и социјална политика, за транспорт и врски, за образование и наука, за култура, за здравство, за економија, Државниот завод за статистика, Агенцијата за млади и спорт, како и Агенцијата за вработување на Република Северна Македонија и Фондот за здравствено осигурување на Република Северна Македонија.
Овие институции по периоди треба „јасно да ги испланираат активностите и мерките во кои се носители и/или учесници, во Акцискиот план 2023-2026, како и навремено да ги обезбедат потребните ресурси (човечки, материјални и технички) за нивна имплементација.
-Националната стратегија е подготвена со апсолутна партиципација на 27 организации на лицата со попреченост, сите агенции на ООН во државата и на Делегацијата на Европската Унија. Во подготовката и со свои предлози учествуваа 31 државна институција, академската фела преку Факултет за специјална едукација Скопје, Правен факултет - Скопје, Државен универзитет во Тетово, Стопанската комора на Република Северна Македонија. Во процесот активно беа вклучени сите национални сојузи на инвалидски организации во државата, Здружението на родители на деца со попреченост „Ресурсен центар“, здруженијата на граѓани „Во мојот свет“, „Отворете ги прозорците“, „Инклузива“ Куманово, „Полио Плус, „Хера“, Младинско здружение на глуви и наглуви „Млад Знак“, Доза Среќа, Институт за човекови права, Друштво за помош на лица со посебни потреби „Зрак“, Еурека Културен Центар, Куќа на среќа, Време е, Здружение на инвалиди „Шпреса“, ЗГ„Миресија“, Фондацијата „Чекор по чекор“, Избор Струмица, Македонско здружение на млади правници - МЗМП Скопје, Хелсиншки комитет, претставници од канцеларијата на Народниот правобранител и други, соопшти владината прес-служба.
Оваа стратегија, наведува Владата, е развиена согласно обврските и начелата преземени со Конвенцијата за правата на лицата со попреченост, чие мото е „Ништо за нас, без нас“. Потоа таа е комплементарна со Европската стратегија за правата на лицата со попреченост, врз основа на податоци и анализи направени за моменталната состојба со почитувањето и остварувањето на правата на лицата со попреченост. хс/са/
Фото: МИА архива