ВВ „Тиквеш“ ги закрои лозјата во чест на Св. Трифун и најави три нови вина
- Винарската визба „Тиквеш“ и годинава на локалитетот Лепово во близина на Неготино ја продолжи традицијата на симболично закројување на лозјата во чест на заштитникот на лозарите и винарите, С
![ВВ „Тиквеш“ ги закрои лозјата во чест на Св. Трифун и најави три нови вина](https://mia.mk/index.php/images/20221112050644_big_730x400_55.webp )
Скопје, 14 февруари 2022 (МИА) - Винарската визба „Тиквеш“ и годинава на локалитетот Лепово во близина на Неготино ја продолжи традицијата на симболично закројување на лозјата во чест на заштитникот на лозарите и винарите, Св. Трифун.
На традиционалното закројување на лозјето, покрај претседателот на Управниот одбор на ВВ „Тиквеш“, Светозар Јаневски и генералниот директор Радош Вукиќевиќ, присуствуваа и премиерот Димитар Ковачевски, вицепремиерот за економски прашања Фатмир Битиќи и министерот за земјоделство, шумарство и водостопанство Љупчо Николовски, како и претставници на дипломатскиот кор.
-Денешниот празник, за нас винарите, е симбол за нов почеток на процесот во кој се раѓа новото вино, за што се важни и природните услови, но и технологијата која гарантира квалитет. Постојано работиме на создавање на нови вина во нашето портфолио, кои се спој на природата и знаењето. Новите врвни вина, Sauvignon Blanc од брендот Барово, а до крајот на годната и двете вина од сортите виоње и плавец од брендот Бела вода, се резултат на изборот на сорти кои совршено одговараат со условите на микролокациите кадешто се одгледуваат. Покрај тоа, ВВ „Тиквеш“ годинава првпат ќе произведе вино од органско грозје од локалитетот Лепово, што за нас е отворање на едно ново поглавје, со кое создаваме уште повисоки критериуми за квалитет. Денес кога го славиме Св. Трифун и моќта на природата, огромно е задоволството да се сподели ваква вест, која е нова додадена вредност за нашата винарница и за конкуретнноста на нашите вина, рече Вукиќевиќ.
ВВ „Тиквеш“ ги заокружува своите инвестиции во обновливи извори на енергија, со што компанијата ќе стане првата зелена винарница во регионот, намалувјќи ги емисиите на јаглерод диоксид од своето производство. Љубителите на врвно вино годинава ќе уживаат во три нови извонредни вина, создадени од грозје од специфични микролокации од локалитетите Барово и Бела Вода. Наскоро на пазарот ќе биде достапно виното „Sauvignon Blanc“ од брендот Барово, а во текот на годината ќе следат и вина од сортите виоње и плавец под брендот Бела вода.вј/дма/
![Закројување лозје](/articles/images/%d0%b2%d0%b2-%d1%82%d0%b8%d0%ba%d0%b2%d0%b5%d1%88-%d0%b3%d0%b8-%d0%b7%/lXdzRUQsA/placeholder.webp?use_watermark=0)
![Закројување лозја Тиквеш](/articles/images/%d0%b2%d0%b2-%d1%82%d0%b8%d0%ba%d0%b2%d0%b5%d1%88-%d0%b3%d0%b8-%d0%b7%/gsGgVrtkV/placeholder.webp?use_watermark=0)