Газа, 27 јануари 2026 (МИА) - Хамас бара да ги вклучи своите 10.000 полицајци во новата палестинска администрација во Газа, поддржана од САД, што е барање на кое Израел веројатно ќе се спротивстави, додека групата дебатира за предавање на оружјето, велат извори.

Како што пренесе „Тајмс оф Израел“, Хамас ја задржува контролата над нешто помалку од половина од Газа по договорот за прекин на огнот во октомври, постигнат со посредство на американскиот претседател Доналд Трамп. Договорот го поврзува понатамошното повлекување на израелските трупи со откажувањето на Хамас од неговото оружје.

Планот од 20 точки за ставање крај на војната, кој сега е во втора фаза, предвидува управувањето со Газа да му биде предадено на Националниот комитет за администрација на Газа (НЦАГ), палестинско технократско тело под американски надзор, кое треба да го исклучи Хамас.

Во писмо до вработените од завчера, владата во Газа предводена од Хамас ги повика своите повеќе од 40.000 државни службеници и безбедносен персонал да соработуваат со НЦАГ, но ги увери дека работи на нивно вклучување во новата влада.

Тоа би ги опфатило и приближно 10.000 припадници на полициските сили на Хамас, велат четворица извори запознаени со ситуацијата, барање што претходно не беше познато. Многумина од нив патролираат низ Газа додека Хамас ја враќа контролата во областите под негова власт.

Засега не е јасно дали Израел, кој децидно го отфрли секое вклучување на Хамас во иднината на Газа, ќе се согласи на вклучување на цивилните и безбедносните работници во НЦАГ. Кабинетот на премиерот Бенјамин Нетанјаху не одговорил на барањето за коментар. јт/

Фото: ДПА