Брисел, 13 февруари 2025 (МИА) - Францускиот министер за вооружени сили Себастијан Лекорњу денеска предупреди дека на Русија не смее да ѝ се дозволат прекумерни отстапки во рамките на можните мировни преговори за Украина.

„Ако мирот не биде постигнат преку сила, тоа може да доведе до драматична ситуација, а на подолг рок и до нова ескалација на конфликтот“, изјави Лекорњу на маргините на состанокот на министрите за одбрана на НАТО во Брисел.

Тој истакна дека „мир преку слабост“ би испратил погрешен сигнал кон Северна Кореја, Иран, па дури и Кина.

Изјавата на Лекорњу доаѓа еден ден откако американскиот претседател Доналд Трамп најави дека ќе разговара со рускиот лидер Владимир Путин за можен прекин на војната во Украина.

Во исто време, администрацијата на Трамп за првпат јавно објави како ја замислува потенцијалната мировна спогодба, нагласувајќи дека Украина треба да се откаже од аспирациите за членство во НАТО и да не инсистира на враќање на териториите од 2014 година.

Францускиот министер оцени дека оваа позиција отвора прашања за иднината на НАТО.

Тие велат дека НАТО е најмоќниот воен сојуз во историјата, и тоа е точно. Но, вистинското прашање е дали ќе остане таков и во наредните 10 или 15 години, додаде Лекорњу. ссм/

фото: ДПА