Скопје, 16 март 2026 (МИА) - Филмот „Малдорор“ на режисерот Фабрис ди Велц ја освои наградата на публиката на Јадранската мрежата на фестивалите (Adriatic Audience Award), која беше доделена на 31. издание на Фестивалот на авторски филм во Белград.

Целта на наградата на Adriatic Audience Award е промоција и поголема видливост на европските филмови, а благодарение на оваа наград, филмот ќе се прикажува од 19 март до 9 април во градовите во регионот на поранешна Југославија - во Белград, Сараево, Херцег Нови, Љубљана, Загреб, Битола (киното „Манаки“, 20 и 21 март и Центарот за култура - 25 и 26 март), Охрид (ФИОФА 27 и 28 март) и во Скопје (Кинотеката - 7, 8 и 9 април и во „Синеплекс“).

„Малдорор“ е трилер инспириран од вистински настани од Белгија во средината на деведесеттите години. Приказната почнува кога две девојчиња исчезнуваат, а младиот и импулсивен полициски регрут Пол Шартие е распореден во тајната единица наречена „Малдорор“, формирана за да следи опасен сексуален престапник. Кога операцијата не успева, разочаран од ограничувањата на правниот систем, Шартие се впушта во соло потрага решен да ги пронајде и изведе сторителите пред лицето на правда.

Филмот претставува силен и реалистичен приказ на борбата против длабоко вкоренетото зло, но и на општеството што потфрла пред најранливите. „Малдорор“ е првиот дел од планираната трилогија на Фабрис ди Велц за темната страна на белгиската историја, моќта и правдата. Филмот ја имаше својата светска премиера на Филмскиот фестивал во Венеција.

Порталот Screen Daily наведува дека „Малдорор“ личи на епските приказни за злосторства и казна, кои ја карактеризираа американската кинематографија во седумдесеттите години, особено филмовите на Сидни Лумет, а Ди Велц ги претвора вистинските настани во сложена и повеќеслојна приказна за полицаец чија потрага по правда доаѓа во конфликт со сите блиски до него. Растечката тензија, моралните дилеми и личните последици го прават овој филм моќен и возбудлив трилер. 

Според порталот Cineuropa, „Малдорор“ е амбициозна и повеќеслојна филмска фреска за Белгија во деведесеттите години - за нејзините институционални дисфункции и колективни трауми, но и за разгранетата природа на злото. Во овој филм Ди Велц се свртува кон полицискиот жанр носејќи ја публиката во срцето на сицилијанската заедница во Шарлроа во средината на деведесеттите години, во приказна инспирирана од случајот на Марк Дитру.

Филмот „Малдорор“ освои најмногу гласови од публиката со сумирање на резултатите од сите фестивали - членки на Јадранската мрежа, вклучувајќи ги Фестивалот „Браќа Манаки“ во Македонија, Филмскиот фестивал во Сараево, Филмскиот фестивал во Херцег Нови, Меѓународниот филмски фестивал во Љубљана, Фестивалот на авторски филмови и Филмскиот фестивал во Загреб. 

Фестивалската мрежа на Јадранскиот Регион е поддржана од потпрограмата „Медија“ на програмата „Креативна Европа“. ац/

Фото: Плакат