Кито, 4 февруари 2025 (МИА) - Еквадорскиот претседател Даниел Нобоа најави затворање на границите на земјата од сабота на три дена, вклучувајќи го и првиот круг од претседателските избори во недела, на кои тој е кандидат.

„Со оглед на обидите на вооружените групи да ја дестабилизираат земјата, од сабота, 8 февруари, до понеделник, 10 февруари, границите ќе останат затворени“, изјави денеска лидерот на својот профил на социјалната мрежа Икс.

Триесет и седумгодишниот претседател одлучи да го зајакне и военото присуство во пограничните области и веднаш да ја зголеми воената безбедност на пристаништата.

Минатата сабота, Даниел Нобоа го спомна апсењето од безбедносните служби за време на неговата реизборна кампања на 12 лица облечени во полициски и армиски униформи, носејќи оружје и муниција и опремени со беспилотно летало, нарекувајќи ги „нарко-терористи“ кои се обидуваат да ја „дестабилизираат „земјата.

Нобоа, син на банански тајкун и милијардер, дојде на власт во ноември 2023 година за да ги заврши 18-те месеци од мандатот на неговиот претходник Гилермо Ласо, кој поднесе оставка за да избегне постапка за импичмент поради обвиненија за корупција.

Во јануари 2024 година Нобоа прогласи дека земјата е во „внатрешен вооружен конфликт“ откако бегството на моќниот наркобос од затворот во Гвајакил предизвика бран насилство.

Во Еквадор, околу 20 банди се вклучени во трговија со дрога, киднапирања и изнуда, сеење терор и смрт во оваа јужноамериканска земја со 17 милиони жители. паг/

Фото: ЕПА