Тетово, 26 март 2026 (МИА) - Општина Тетово ги повика граѓаните да учествуват во консултативниот прашалник во врска со Физибилити студијата за дигитална трансформација на водомерните услуги.

Оваа студија беше презентирана преку две јавни расправи досега и ја испитува оправданоста од воведување дигитални водомери и наплаќање на сметки од далечина, како и воведување на јавно-приватно партнерство за овие услуги. 

„Овој процес има за цел да ги процени можностите за модернизација на јавните услуги, како и подобрување на ефикасноста, точноста и транспарентноста во управувањето со потрошувачката на вода. Ги повикуваме граѓаните преку овој прашалник да ги споделат своите прашања, забелешки и предлози, бидејќи вклученоста на јавноста останува клучен елемент во креирањето политики и решенија што директно влијаат врз секојдневниот живот“, се вели во повикот на општината која подготви и онлајн прашалник (https://docs.google.com/.../1FAIpQLSfulEhXDoe2GC.../viewform) 

Базата со податоци на комуналното претпријатие има регистрирано околу 22.000 корисници, но се смета дека има и до 40-50 илјади корисници кои се приклучени на водоводната мрежа, но не се регистрирани како потрошувачи на водата. 

Според податоците на општината, годишно во водоводниот систем протекуваат 10 милиони кубици вода, а сметки се даваат за потрошени 3 милиони кубици. Од тие три милиони кубици се наплаќаат максимални 60 отсто. ас/вг/

фото МИА архива