Куманово, 26 јануари 2025 (МИА) - Изградбата на водоводна, фекална и атмосферска канализација во индустриската зона Речица, во Кумановско, ќе привлече нови инвестиции и ќе придонесе за раст на локалната економија, објави денеска на социјалните мрежи претседателот на Владата, Христијан Мицкоски, во делот „проекти за трајна промена - темели за сигурна иднина.

- Изградба на водоводна мрежа, фекална и атмосферска канализација, изградба на дел од внатрешни сообраќајници, воспоставување режим на сообраќај и осветление на дел од внатрешните сообраќајници во индустриската зона во општина Куманово. Во тек е голем инфраструктурен зафат во индустриската зона во Куманово - инвестиција вредна 210.612.489 денари, финансирана од Владата преку Министерството за транспорт и врски - објави премиерот.

Во објавата се наведува дека се работи на изградба на водоводна, фекална и атмосферска канализација, како и нови внатрешни улици со поставување сообраќајна сигнализација и јавно осветление.

Со проектот, како што се наведува, индустриската зона добива подобра инфраструктурна основа, поголема функционалност и подобри услови за привлекување нови инвестиции и развој на локалната економија. ам/вг/

Фото: ФБ Христијан Мицкоски