Скопје, 22 април 2025 (МИА) - Медиумската информативна агенција демантира дека снимила интервју со премиерот Христијан Мицкоски, во кое тој говори за апликација за тргување со биткоин и со други криптовалути.

На социјалните мрежи е објавен линк со наслов „Христијан Мицкоски: Милионерите полудеа! Тие создадоа апликација која овозможува  секој да се збогати“, во кој е објавена  лажна информација, дека главната и одговорна уредничка Ана Цветковска разговарала со премиерот Мицкоски за апликацијата за тргување. При тоа се злоупотребени името на Агенцијата,  која е прикажана со видоизменето лого, како и фотографии на МИА. 

Во име на влијанието, довербата и проверени и точни информации, што е мотото на работењето на МИА, посочуваме дека содржината во текстот е целосно измислена и лажна. Ова е класична злоупотреба на влијанието на МИА и ги информираме нашите корисници и читатели дека станува збор за целосна невистина, манипулација на граѓаните и класична лажна информација,  измислено интервју со премиерот Мицковски на МИА, поради што случајот е пријавен до надлежните институции од кои очекуваме соодветна реакција и санкции за сторителите.