Сараево, 25 ноември 2025 (МИА) - Делови од Босна и Херцеговина ќе го одбележат Денот на државноста денеска, 25 ноември, објавува босанското издание на регионалниот телевизиски канал Н1.

Празникот се слави во Федерацијата на Босна и Херцеговина како официјален, а денот е неработен. Во Федерацијата се организираат комеморативни церемонии, положување цвеќе и прием во Градското собрание на Сараево, организирани од хрватските и бошњачките членови на трипартитното претседателство на Босна, Жељко Комшиќ и Денис Бечировиќ. Во Република Српска, денот не се слави официјално.

Државните и локалните институции, ветераните и јавните организации ќе положат венци и цвеќе на спомениците посветени на Втората светска војна и војната од 1990-тите.

Според Дејтонскиот мировен договор, со кој заврши Босанската војна (1992-1995), земјата беше поделена на два полуавтономни дела - Република Српска, населена главно со босански Срби, и Муслиманско-хрватската Федерација на Босна и Херцеговина, каде што живеат босански муслимани (Бошњаци) и босански Хрвати. Секој дел има своја влада, парламент и полиција, но двата се поврзани со заеднички институции на државно ниво, вклучувајќи судство, армија, безбедносни служби и даночна администрација.

Датумот 25 ноември ја означува одлуката на првиот состанок на Националниот антифашистички совет за народно ослободување на Босна и Херцеговина во Мркоњиќ Град во 1943 година, со кој беше обновена босанската државност и беа потврдени историските граници на земјата, кои постоеја уште од времето на средновековна Босна, потсетува Н1. На состанокот беа избрани 172 советници од сите региони на земјата и беше формиран Президиум од 31 член со д-р Воислав Кецмановиќ како претседател.

Главниот документ на состанокот нагласуваше дека Босна и Херцеговина не е ниту српска, ниту хрватска, ниту муслиманска држава, туку заедничка држава за сите три народа, кои треба да живеат во целосна рамноправност и еднакви права. На следната седница на Советот во јуни-јули 1944 година, телото беше основано како највисок државен орган на Босна и Херцеговина.

Така, Босна и Херцеговина формално ја обнови својата државност за прв пат по падот на средновековното Босанско Кралство во 1463 година, по повеќе од четири века странска власт.

Денот на државноста се славеше низ цела Босна и Херцеговина до почетокот на војната во 1992 година. По потпишувањето на Дејтонскиот мировен договор во 1995 година, 25 ноември остана официјален празник само во Федерацијата, додека Република Српска не го признаваше. мс/јт/

фото: МИА архива