Uashington, 10 janar 2026 (MIA) – Presidenti amerikan Donald Tramp deklaroi se SHBA-ja duhet ta “posedojë” Grenlandën që t’i pengojë Rusinë dhe Kinën që ta marrin, duke thënë se kjo do të bëhet “në mënyrë të lehtë ose të vështirë”. 

Deklarata e ashpër vjen pas sinjaleve të fundit nga Shtëpia e Bardhë se administrata mendon ta blejë territorin gjysmëautonom nga Danimarka, por nuk e përjashton mundësinë për aneksim të dhunshëm, shkruan Bi-Bi-Si. 

Danimarka dhe Grenlanda ashpër e hodhën poshtë ofertën e Trampit, duke thënë se territori nuk është në shitje. Kopenhaga paralajmëroi se çdo aksion ushtarak kundër një anëtare të NATO-s do të nënkuptonte fundin e aleancës transatlantike të mbrojtjes. 

“Vendet duhet të kenë pronësi dhe ju mbroni pronësinë, ju nuk mbroni marrëveshjet e qirasë, dhe ne do të duhet të mbrojmë Grenlandën”, u tha Trampi gazetarëve në Uashington.

Presidenti amerikan vazhdimisht thekson se Grenlanda është kyçe për sigurinë kombëtare të SHBA-së, duke thënë pa dëshmi se ishte “mbuluar kudo me anije ruse dhe kineze”. 

Edhe pse SHBA-ja tashmë ka më shumë se 100 ushtarë të stacionuar përgjithmonë në bazën Pitufik në Grenlandën veriperëndimore, të cilën e menaxhojnë nga Lufta e Dytë Botërore, Trampi beson se marrëveshjet ekzistuese për qira nuk janë të mjaftueshme. 

“Vendet nuk mund të bëjnë marrëveshje nëntëvjeçare apo edhe 100-vjeçare”, tha ai, duke këmbëngulur në pronësi të plotë. “Unë i dua njerëzit e Kinës. Unë i dua njerëzit e Rusisë”, shtoi Trampi. “Por nuk i dua ata si fqinjë në Grenlandë, kjo nuk do të ndodhë. Dhe, meqë ra fjala, NATO duhet ta kuptojë këtë”, theksoi ai.

Aleatët kryesorë të NATO-s, përfshirë vendet kryesore evropiane dhe Kanadanë, ofruan mbështetjen e tyre për Danimarkën këtë javë. Në deklarata të përbashkëta, ata riafirmuan se "vetëm Danimarka dhe Grenlanda mund të vendosin për çështje që kanë të bëjnë me marrëdhëniet e tyre".

Ata theksuan se siguria e Arktikut është interes i përbashkët që duhet të arrihet "kolektivisht" brenda aleancës dhe bënë thirrje për "respektim të parimeve të Kartës së OKB-së, duke përfshirë sovranitetin, integritetin territorial dhe paprekshmërinë e kufijve".

Shqetësimet për të ardhmen e Grenlandës janë shtuar më tej nga veprimi i fundit ushtarak i SHBA-së në Venezuelë. Trampi më parë ofroi të blinte ishullin gjatë mandatit të tij të parë në 2019, por edhe atëherë iu tha se nuk ishte në shitje. U raportua se sekretari shtetëror amerikan, Marko Rubio, do të zhvillonte bisedime me përfaqësuesit danezë javën e ardhshme.

Përveç lokacionit të saj strategjik ndërmjet Amerikës së Veriut dhe Arktikut, që është kyç për sistemet për alarmim të hershëm, Grenlanda u bë interesante edhe për shkak të burimeve të saja natyrore. 

Për shkak të ndryshimeve klimatike dhe shkrirjes së akullit, depozitat e pasura të metaleve të rralla të tokës, uraniumit dhe hekurit janë gjithnjë e më të arritshme, ndërsa shkencëtarët besojnë se ka edhe rezerva të konsiderueshme të naftës dhe gazit. fc/

Foto: EPA